ⲇⲟⲝⲟⲗⲟⲅⲓⲁ ⲏⲭⲟⲥ ⲃⲁⲧⲟⲥ ⲡⲓⲕ̅ⲁ̅ ⲙ̀ⲙⲁⲣⲧⲩⲣⲟⲥ ϧⲉⲛϯⲗⲓⲃⲏ ⲁⲩⲙ̇ⲧⲟⲛⲙ̇ⲙⲱⲟⲩ ϧⲉⲛⲥⲟⲩⲋ̄ ⲙ̀ⲡⲓⲁⲃⲟⲧ ⲙⲉⲭⲓⲣ ⲁ̣ⲯ̄ⲗ̄ⲁ̄ ⲙ̀ⲙⲁⲣⲧⲩⲣⲟⲥ
ⲙ̀ⲡⲉⲣⲉⲣϩⲟϯ ϧⲁⲧⲉⲥϩⲏ
̀ⲛϯⲥⲏϥⲓ ⲙ̀ⲃⲉⲛⲓⲡⲓ
ϫⲉⲧⲉⲥϧⲏⲓⲃⲓ ⲛ̀ⲛⲉⲥⲧⲁϩⲉ
ⲫⲟⲩⲱⲓⲛⲓ ⲛ̀ⲧⲉ ⲡⲓⲗⲟⲅⲟⲥ
ⲡⲓϫⲱⲧⲟⲩⲁⲓ ⲛ̀ⲁⲅⲁⲑⲟⲥ
ⲁⲩⲫⲓⲣⲓ ϧⲉⲛⲡⲓϣⲁϥⲉ
ⲕⲁⲗⲱⲥ ⲁⲩⲉⲣⲟⲙⲟⲗⲟⲅⲓⲛ
ⲙ̀ⲡⲉⲙⲑⲟ ⲛ̀ⲛⲓⲣⲱⲙⲓ
ⲁⲩⲱϣ ⲉⲃⲟⲗ ⲉⲩϫⲱⲙⲙⲟⲥ
ϫⲉⲡⲓⲗⲟⲅⲟⲥ ⲁϥϭⲓⲥⲁⲣⲝ
ⲛⲓⲙ ⲉⲑⲛⲁⲉϣⲫoⲣϫⲧⲉⲛ
ⲥⲁⲃⲟⲗ ⲛ̀ⲧⲉϥⲁⲅⲁⲡⲏ
ⲡⲓϭⲱⲓϫ ⲛ̀ⲁⲑⲗⲟⲫⲟⲣⲟⲥ
ⲡϣⲏⲣⲓ ⲛ̀ⲁⲓⲁⲣⲓⲅⲏ
ⲡⲉϫⲁϥ ϫⲉⲡⲟⲩⲛⲟⲩϯⲡⲉ
ϯⲙⲉⲑⲙⲏⲓ ⲛⲉⲙⲡⲓⲟⲩϫⲁⲓ
ⲕⲁⲧⲁ ⲫⲣⲏϯ ⲉⲧⲁⲩϫⲟⲥ
ϫⲉⲉⲑⲃⲏⲧⲕ ⲥⲉϧⲱⲧⲉⲃ ⲙ̀ⲙⲟⲛ
ⲙ̀ⲡⲓⲉϩⲟⲟⲩ ⲧⲏⲣϥ ⲁⲩⲟⲡⲧⲉⲛ
ⲛ̀ϩⲁⲛⲡⲁⲅⲁⲛⲟⲥ ⲛ̀ⲁⲧϩⲏⲧ
ⲟⲩⲥⲙⲏ ⲁⲩⲥⲟⲑⲙⲉⲥ ϧⲉⲛⲭⲏⲙⲓ
ⲧⲙⲟⲩⲛⲉ ⲉⲥⲣⲓⲙⲓ ⲉⲛⲉⲥϣⲏⲣⲓ
ⲡⲓϫⲱⲧⲟⲩⲁⲓ ⲙ̀ⲙⲁⲣⲧⲩⲣⲟⲥ
ϧⲉⲛⲥⲩⲣⲧⲟⲥ ⲛ̀ϯⲗⲓⲃⲩⲏ
ⲁⲫⲣⲓⲕⲏ ⲛⲁⲥⲟⲩⲱϣ ⲁⲛ ⲡⲉ
ⲉϯⲛⲟⲙϯ ⲛⲁⲥ ⲉⲑⲃⲉ
ⲡⲓⲟⲩⲉⲣⲧ ⲉⲧⲁϥⲭⲱ ⲛ̀ⲥⲱϥ
ⲧⲉⲣⲏⲙⲟⲥ ⲛ̀ⲕⲟⲥⲙⲓⲕⲟⲛ
ⲭⲉⲣⲉ ⲛⲱⲧⲉⲛ ⲛⲓⲙⲁⲣⲧⲩⲣⲟⲥ
ⲙⲁⲧⲑⲉⲟⲥ ⲛⲉⲙⲥⲁⲙⲟⲩⲏⲗ
ⲁⲡⲁⲁⲛⲟⲩⲃ ⲛⲉⲙⲕⲩⲣⲓⲗⲗⲟⲥ
ⲛⲉⲙⲑⲉⲟⲇⲱⲣⲟⲥ ⲛⲉⲙⲡⲓϣⲱⲓ
ⲛⲉⲙⲓⲱⲥⲏⲫ ⲛⲉⲙⲙⲏⲛⲁ
ⲛⲉⲙⲗⲟⲩⲕⲁⲥ ⲛⲉⲙⲡⲓϣⲱⲓ ⲟⲛ
ⲛⲉⲙⲥⲁⲙⲟⲩⲏⲗ ⲫⲁ ⲥⲧⲉⲫⲁⲛⲟⲥ
ⲛⲉⲙⲡⲥⲉⲡⲓ ⲙ̀ⲙⲁⲣⲧⲩⲣⲟⲥ
ⲧⲱⲃϩ ⲙ̀ⲡ⳪̅ ⲉϩⲣⲏⲓ ⲉϫⲱⲛ
ⲛⲓⲡⲟⲗⲉⲙⲓⲥⲧⲏⲥ ⲙ̀ⲡⲓⲥⲧⲟⲥ
ⲛⲓⲙⲁⲣⲧⲩⲣⲟⲥ ⲛ̀ϯⲗⲩⲃⲏ
ⲛ̀ⲧⲉϥⲭⲁ ⲛⲉⲛⲛⲟⲃⲓ ⲛⲁⲛ ⲉⲃⲟⲗ